सल्यानकाे बागचौर नगरपालिका वडा नं. ५ काे नवनिर्मित वडा कार्यालय भवन, नवनिर्मित कभर्डहल तथा चाैथाे वडा अध्यक्ष कप खेलकुद प्रतियोगिताको उद्घाटन गरिएको छ ।
बागचौर नगरपालिकाकाे लागतमा निर्माण भएको वडा कार्यालय भवन, कभर्डहल तथा वडा अध्यक्ष कप खेलकुद प्रतियोगिताको कार्यक्रमका प्रमुख अतिथि बागचाैर नगरपालिकाका नगर प्रमुख जनकराज गाैतमले उद्घाटन गर्नुभएको हाे।
वडा कार्यालयकाे आफ्नै भवन नभएकोले कार्यालय सञ्चालन तथा सेवाग्राहीलाई सेवा प्रबाहमा कठिनाई हुने गरेकाेमा नवनिर्मित भवन बाट कार्यालय संचालन भएपछि समस्या समाधान भएको नगर प्रमुख गाैतमले बताउनुभयो । वडा कार्यालय व्यवस्थित नभएसम्म वडा तहको कार्य सम्पादन व्यवस्थित हुन नसक्ने नगर प्रमुख गाैतमकाे भनाइ छ । नवनिर्मित वडा कार्यालयको भवनबाट सेवाग्राहीले सहज रुपमा सेवा प्राप्त गर्ने र भवनको पूर्ण सदुपयोग हुनेमा विश्वास व्यक्त गर्नुभयो ।
खेलाडीहरुकाे आवश्यकतालाई मध्यनजर गर्दै, खेल क्षेत्रकाे विकासमा टेवा पुर्याउने उदेश्यले कभर्डहल निर्माण गरिएको उहाँले बताउनुभयो । कडा अध्यक्ष कप खेलकुद प्रतियोगितामा खेलाडीले अनुशासित तरिकाले आफ्नो खेल तथा प्रतिभा प्रस्तुत गर्न र रेफ्रीहरुले निष्पक्ष रुपमा खेल खेलाउन नगर प्रमुख गाैतमले निर्देशन दिनुभयो ।
नगरपालिकाले भौतिक पूर्वधार निर्माणसँगै शिक्षा, स्वास्थ्य, कृषि, सडक, विद्युत विस्तार, खानेपानी लगायतको क्षेत्रमा पनि प्राथमिकताका साथ काम गरिरहेको नगर प्रमुख गाैतमले बताउनुभयो।
वडा नं. ५ का वडा अध्यक्ष जाेगेन्द्र वलीले वडा कार्यालय निर्माणका लागि प्रत्यक्ष अप्रत्यक्ष रुपमा सहयोगी भूमिका खेल्ने र समन्वय गर्ने सबैलाई धन्यवाद दिनुभयो ।
बागचाैर नगरपालिका वडा नं. ५ का वडा अध्यक्ष जाेगेन्द्र वलीकाे अध्यक्षतामा भएको भवन उद्घाटन तथा वडा अध्यक्ष कप खेलकुद प्रतियोगिताकाे उद्घाटन समारोहमा प्रमुख अतिथि नगर प्रमुख जनकराज गाैतम, बिशिस्ट अतिथि उप-प्रमुख सुम्निमा डि.सी वली, निमित्त प्रमुख प्रशासकीय अधिकृत हरि बहादुर कठायत, नेपाली काँग्रेस कर्णाली प्रदेश सह-महामन्त्री एकराज डाँगी, नगर प्रवक्ता दिपेश डि.सी, विभिन्न वडाका वडा अध्यक्ष, कार्यपालिका सदस्य, वडा सदस्य, निवर्तमान जनप्रतिनिधि, विभिन्न राजनीतिक दलका नेता, शिक्षक, विद्यार्थी, बुद्धिजीवी, समाजसेवी, पत्रकार, व्यापारी लगायत नगरवासीकाे उपस्थिति रहेको थियाे । कार्यक्रमकाे सहजीकरण वडा प्राबिधिक भाबिश जंग शाहीले गर्नुभएको थियो ।