सल्यान बागचौरको मा.वि. लस्तम बनेचौरमा विद्यालय व्यवस्थापन समिति गठन भएको छ । बागचौर नगरपालिका वडा नं. २ बनेचौरमा रहेको उक्त विद्यालयमा अविभावक भेलाले स्थानीय बुद्धिजिवी तारादेव भण्डारीको अध्यक्षतामा ६ सदस्यीय व्यवस्थापन समिति गठन गरेको हो ।
जेष्ठ नागरिक जिवलाल डाँगीको अध्यक्षतामा भएको भेलाबाट ६ जना सदस्यहरु निर्वाचित भएपछि तिनै सदस्यले अध्यक्षमा तारादेव भण्डारीलाई चुनेका हुन ।
अभिभावकबाट चुनिएका समिति सदस्यहरुमा भद्र बहादुर डिसी, बुद्धिराज केसी, तोला केसी र कमला केसी रहेका छन । भेलाले शिक्षाप्रेमी नन्दकला सुनारलाई पनि सदस्यमा चयन गरेको छ ।
भेलामा बागचौर नगरका प्रवक्ता तथा शिक्षा समिति सदस्य एवम् २ नं. वडाका अध्यक्ष दिपेश डिसीको प्रमुख आतिथ्यता रहेको थियो ।
कार्यक्रममा नगर शिक्षा समिति सदस्य नवराज डिसी, शिक्षक अभिभावक संघका अध्यक्ष भद्र बहादुर डिसी लगायत विभिन्न राजनीतिक दलका प्रतिनिधि, भुपुअध्यक्ष तथा विभिन्न विद्यालयका प्रधानाध्यापक र स्थानीयको उपस्थिती रहेको थियो ।
पटक पटक बसेको भेलाले विव्यस गठन नगरेकोमा यसपटकको भेलाले विव्यस गठन गरेकोमा स्थानीय अभिभावक खुशी भएका छन । उनिहरुले यसका लागि पहल गर्ने वडा सरकार र सरोकारवालाई धन्यवाद दिदै विद्यालयको पठनपाठनलाई व्यवस्थीत बनाउन अनुरोध समेत गरेका छन ।